محاسبة تكاليف 2

فى الجزء الأول عرفنا يعنى ايه محاسبة تكاليف
والتكاليف الصناعية وغير الصناعية
وتكاليف المنتج وتكاليف الفترة
والتكاليف المباشرة وغير المباشرة
فى الجزء ده هنكمل الجزء الأول

تعالوا نبدأ

• تصنيفات التكلفة
Cost classifications
بوص يا سيدي الناس اللي بتقسم التكاليف دي مش بتقسمها علي مزاجها
في تقريباً 4 تقسيمات أساسية
1- ( Value adding ( Manufacturing vs. Non Manufacturing
من ناحية اضافة القيمة " شرحناها في أول جزء "
2- ( Financial reporting ( Product vs. Period
التقارير المالية " شرحناها في أول جزء "
3- ( Cost traceability ( Direct vs. Indirect
تتبع التكلفة " شرحناها في أول جزء "
4- ( Cost behavior ( Variable vs. Fixed
سلوك التكلفة " هنشرحها فى الجزء ده بس عاوزك تركز معايا شويه كدا "

Variable cost
التكلفة المتغيرة
دي من اسمها كدا هي التكلفة التي تتغير بتغير حجم الانتاج
اشرح اكتر " حاضر "
لو انت عندك مصنع كراسي " متقاطعش بس قول يا رب "
بتنتج الكرسي الواحد بيتكلف 3 متر خشب المتر ب 2 جنيه
انتجت كرسي هتبقي التكلفة 1 كرسي × 3 متر خشب × 2 جنيه = 6 جنيه
طيب انتجت 2 التكلفة 2 كرسي × 3 متر خشب × 2 جنيه = 12 جنيه
و هكذا كل ما زاد حجم الانتاج زادت التكلفة
بس عوزك تاخد بالك من حاجة
التكلفة دلوقتي متغيرة بتغير حجم الانتاج بس ثابتة علي مستوي الوحدة
ايه دا يعني اي
يعني الوحدة الواحدة تكلفتها 6 جنية خشب
انتجت 10 وحدات هتفضل الوحدة ب 6 جنية بس اجمالي التكلفة هيكون 60 جنيه

نيجي بقي للتكلفة الثابتة
Fixed cost
مالها
دي يا سيدي بقي العكس
ثابتة مهما انتجت بس متنساش ال Relevant range اللي اتكلمنا عليه قبل كدا
زي ما قولنا الايجار 1000 جنيه في الشهر
انتجت كرسي هتكون تكلفة الايجار 1000
انتجت 10 كراسي هتدفع برضوا ال 1000 جنيه
بس برضوا خد بالك من حاجة كمان
التكلفة الثابتة متغيرة علي مستوي الوحدة
ازاي يا عم الحج " بوص معايا "
مش قولنا لو انتجت كرسي هتدفع 1000 جنيه
يعني تكلفة الكرسي هنا 1000 جنيه ايجار + 6 جنيه خشب = 1006
طيب لو انتجت 10 كراسي
هيبقي تكلفة الكرسي = (1000 جني ايجار / 10 كراسي) + 6 جنيه خشب = 106
ظلت التكلفة الثابتة ثابتة علي مستوي الانتاج ولكن متغيرة علي مستوي الوحدة

بيقولك تكلفة المنتج بتختلف باختلاف السبب اللي انت محتاجها علشانوا
مش فاهم طيب خد دي قبل ما تحسب تكلفة منتج اسال الأول ليه مثلاً هنقول علشان الضرائب
مش هتزود في التكلفة و شغل النصب دا لا
هتحسب كل التكاليف بما فيها تكاليف الدعاية و الاعلان و الإدارة
طيب مثال تاني لو عاوز تعرف هتخصص قد ايه للدعاية السنة دي
هتجيب سعر البيع تطرح تكاليف المنتج بس الباقي ده بقي تقدر تخصص جزء للدعاية زي ما انت عاوز

- طيب مثال كمان بالأرقام
عندك منتج
تكلفة المنتج المتغيرة ١٠ جنيه للوحدة
لو مش فاهم يعني أرجع لشرح التكلفة المتغيرة
وعندك تكاليف ثابتة ايجار ١٠٠٠٠ جنيه و حجم المصنع يخليك تنتج ١٠٠٠ وحدة
بس انت بتنتج و تبيع ٥٠٠ بس
تعالا نحسب تكاليفك كلها كدا
٥٠٠ وحدة × ١٠ جنيه + ١٠٠٠٠ = ١٥٠٠٠
يعني الوحدة الواحدة ب ١٥٠٠٠جنيه ÷ ٥٠٠وحدة = ٣٠ جنيه
و انت بناء علي كدا بتبيع ب ٤٠ جنيه الوحدة
و جاتلك شركة قالتلك انا عاوزه اشتري منك ٥٠٠ وحدة الوحدة ب ٢٥ جنيه توافق ولا ترفض
اكيد هرفض " ليه بس يا عم استني شوية "
مش انت بتنتج ٥٠٠ و الناس دول هياخدوا ٥٠٠ كمان
يعني ١٠٠٠ وحدة
تعالا نحسب التكلفة
١٠٠٠ وحدة × ١٠ جنيه + ١٠٠٠٠ ايجار = ٢٠٠٠٠ جنيه
يعني تكلفة الوحدة ٢٠٠٠٠ جنيه ÷ ١٠٠٠ وحدة = ٢٠ جنيه
يعني هتكسب ٥ جنيه
هيبقي هتوافق
طيب لو جم قالولك احنا هنشتري ال ٥٠٠ وحدة بس ب ١٩ جنيه الوحدة
لا يا عم انا كدا مش هوافق مهما عملت استحالة دا انا كدا هخسر
طيب تعالا اقولك علي حاجة
مش انت كدا كدا بتنتج ال ٥٠٠ و بتدفع ال ١٥٠٠٠ تكلفة
يعني كدا كدا دافع الايجار
يعني لو انتجت ال ٥٠٠ التانين و بعتهم ب ١٩ جنيه الوحدة
هتكون برضوا كسبان ٩ جنيه في الوحدة
ايه يا عم دا انت مجنون
طيب هقنعك بطريقة تانية
اول ٥٠٠ تكلفتهم كلهم ب ١٥٠٠٠جنيه
و تاني ٥٠٠ مش ٥٠٠جنيه ليه والايجار
ايجار ايه يا عم ما انت دفعتوا من اول ٥٠٠
و انت هتبيع ال ٥٠٠ التانين ب١٩ الوحدة يعني ب ٩٥٠٠
يعني كسبان ٤٥٠٠ جنيه
اي خدمة يا عم كسبتك ٤٥٠٠ جنيه في لعبة اهوه
علشان كدا بنقول
Different costs for different purposes
يعنى بالعربى ( تكاليف مختلفة لأغراض مختلفة )

هنبدأ نعرف في الأجزاء الجاية يعني ايه تقنيات التكلفة